TÚR!

TÚR!

Ok ok

Ég er búin að vera tala endalaust um vefnámskeiðin sem ég var að setja í loftið - ég veit ég veit en ég er alltaf í hundrað skemmtilegum verkefnum og eitt af þeim verkefnum er STÓRA TÚR VERKEFNIÐ!

Já þú last það rétt! 

Ég er að skrifa túrbók!

(og auðvitað geri ég meira en bara bók - ekki halda ég láti staðar numið þar! Biddu fyrir þér!)

Ég hef verið undanfarin fimm ár að safna gögnum og ljósmyndum, skrásetja allt saman, fá innsendar upplifanir sam-blæðara, rannsaka sameiginlegar upplifanir og garfast í heimildavinnu og þetta er að fæðast... eða þú veist... er að stækka og dafna, svo maður noti nú fæðingarlíkingarmál (sem á augljóslega vel við þegar kemur að túr umræðu!)

(ein af innsendum myndum!)

Hlutirnir sem ég hef lesið og komist að eru auðvitað snældusnar - margir hverjir og gæti það verið mitt lífsverkefni að rannsaka og greina frá því en eitthvað verður að rata á skraufþurrar blaðsíðurnar, svo mikið er víst, vonandi verður það eitthvað sem þið viljið vita.

Það er eiginlega bara mest spennandi að sjá hversu langt ég get farið í raunveruleika og raunsæi, þið vitið að ég elska að sýna hlutina NÁKVÆMLEGA eins og þeir eru og reyni aldrei að feika neitt og það er nákvæmlega það sem ég gerði hér. Ég er búin að taka fleiri klst af mér að setja upp álfabikar og taka hann út og hreinsa auk þess að mynda bindi og tappa og allskonar... Alveg róleg samt sko - ég ætla ekki að sjokker neinn. Þetta er enn sem komið er bara í minni vörslu en ég get ekki annað en velt því fyrir mér hvort túrfræðsla þurfi ekki að fara upp á annað stig... Ég er amk mjög hugsi um þetta mál allt saman, ég meina, við sýnum fæðingar á YouTube, af hverju ekki að kenna almennilega á túr?